[اوراق شبابية]

تعبت، واتعذبت ويمكن الالم ما كان بيخليها تنام الليل....وده كله عشان سيادتك !(وعشاني برضو)
جات اصعب لحظات ممكن تمر بيها في حياتها ...... لحظات الولاده وما ادراك ما لحظات الولاده!..... صح انت بتقرا طب، بس عمرك ما حتدرس مقدار الالم ده كيف؟!.... بس عشان شوية تقرب مقدار الالم في راسك، تذكر انه في امهات كتير اتوفوا اثناء الولاده لانهم ما قدروا يتحملوا!(وانت ربنا انعم عليك بأنها لسه حيه)
وجيت انت للدنيا دي....... طبعاً بكاي ومزعج،واول شهر تقريباً( اذا ما كان اكتر) ابوك بشيل بطانيته ويفضل انه ينوم في الصالون ارحم ليه من الازعاج اللي انت عامله ده..... والمسكينة الوحيده اللي بتساهر تسكتك هي امك.....وبعد ما كبرت وبقى عمرك سنتين، بقيت هباش واي شي تلقاه قدامك تجرو، وتكسر ده وتخرب ده وامك المسكينة جاريه وراك البيت كله...... ودخلت المدرسة واول يوم عزيت عديييل في المدرسه "داير امي" العبارة الوحيدة الكنت معلق فيها.....ولما وصلت سنه تانية واحد في المدرسة ضربك فجيت البيت بتبكي ، واول ما تدخل البيت الزول الوحيد اللي بتفتش عنه عشان يراضيك هو امك.....وعدت الايام وكبرت وبقيت شاب في الثانوي..... جات امتحانات الشهادة وانت متجرس جرس شديدة، بس بتطمنك دعوات الوالدة وكلماتها "انت اصلاً زول ممتاز، وان شاء الله حتجيب المجموع الدايرو، الله يوفقك" ومما تسمع الكلمات دي بتحس انك ارتحت... وايام الامتحانات كأنك في فندق 5نجوم، كل دقيقة عصير وشاي وقهوة واللي عايزة تلقاه قدامك.... وجبت المجموع ودخلت كلية الطب والحمد لله واصلت كويس.......... لكن امبارح حصلت منك حاجة غريبة جداً....... امك قالت ليك " ياولدي عليك الله امشي معاي ناس فلانه ديل عشان عندهم عزى" وانت تلقائياً كان ردك" يا امي انا ما فاضي والله! شوفي محمد خليه يمشي معاك او احمد برضو ممكن يمشي معاك" ومشت امك مع محمد، وانت قاعد في البيت، طبعاً حتكون فاضي كيف وفي مبارة كورة مسخنة حتبدأ بعد 10 دقايق؟؟؟؟!!!!..... وبرضو سعاد حصلت منها حاجة بنفس مستوى الغرابة ، امها نادتها " يا سعاد! جيبي عدت الضيوف من الصالون وغسليها معاك وارفعيها في الدولاب طوالي عشان الشفع مايكسروها" وسعاد ردت" دقااايق يا امي بس الفاصل يجي" وهي طبعاً متابعة مسلسلتها المفضلة ..........................وغيره وغيره وغيره من المواقف اللي من نفس النوع!!!!
نقطة نظااااااام !دقييييييييييييييييقة بس! انت جااااااااادي وانتي جااادة؟! الكلام ده ما منطي خاااااااااااااااااالص؟!
امك اللي ضيعت عمرها كله عشانك مستخسر فيها 10 دقايق؟ وانت سيادتك ما قادر تفوت اول ربع ساعة في المبارة عشان توصل امك؟؟ وانتي ماقادرة تضيعي ولا ثانية عشان مركزة في مسلسلتك؟؟؟؟وانا برضو ما جادي! وهو ماجادي ! وهي ماجادة!
(عن أبي الدرداء رَضِيَ اللَّهُ عَنْهُ أن رجلاً أتاه فقال: إن لي امرأة وإن أمي تأمرني بطلاقها. فقال سمعت رَسُول اللَّهِ صَلَّى اللَّهُ عَلَيْهِ وَسَلَّم يقول: <الوالد أوسط أبواب الجنة> فإن شئت فأضع ذلك الباب أو احفظه)(وعن ابن عمر رَضِيَ اللَّهُ عَنْهُ قال: كانت تحتي امرأة وكنت أحبها وكان عمر يكرهها فقال لي طلقها فأبيت. فأتى عمر رَضِيَ اللَّهُ عَنْهُ النبي صَلَّى اللَّهُ عَلَيْهِ وَسَلَّم فذكر ذلك له. فقال النبي صَلَّى اللَّهُ عَلَيْهِ وَسَلَّم: <طلقها> ) شايف تطيع ابويك لياتو درجة؟!!×× والله ياحليلنا سااااااي، الله يغفر بس××................غمض عينك لحظة وانا برضو! واتذكر فضل امك عليك.... اتذكر ان رب العباد، العزيز المتعال الجبار، اللي اي شي عنده كاف ونون، وصاك عليها! ...... ياخ انت لو واحد من اصحابك بس عمل معاك موقف جميل بس حتعامله احسن معامله.... وامك اللي ربتك ماتستاهل منك المعامله الراقيه دي؟؟؟!!!! اذا قلت لي ايوه، فياليت تطبق طوالي وانت عارف اللي بيرضي والدتك شنو... وجاهد نفسك لانو بر الوالدين ماحاجه ساهله ، لانه بيوازي الجهاد في سبيل الله.... جاء رجل للنبي صلى الله عليه وسلم فاستأذنه في الجهاد فقال: <أحي والداك؟> قال: نعم. قال: <ففيهما فجاهد > .أما اذا قلت لا! فأنت انسان ناكر للمعروف وجاحد فضلها عليك ! ياليت تلحق نفسك!وتعرف قيمتها قبل ما تفقدها! ( كتبت الكلام ده و انا عارف اني مقصر جداً في حق والديني! بس انا قررت اني اتغير واحاول ارضيهم بأي شكل،،، وانت قررت برضو؟؟)

[blossom]

بسم الله الرحمن الرحيم

السلام عليكم ورحمة الله وبركاته

والله ياخ ... كلامك صاح

أنا مرات بفكر إنو من غير أمي وأبوي أنا شنو أصلا وحأعمل شنو من دونهم..؟؟؟!!

وبحاول كل مرة أتصلح ويا ريت كلنا نعمل وربنا يوفقنا ويرضى عننا جميعا

[roony]

السلام عليكم
اجمل موضوووع في الدنيا
و الكلام فيهو ما بينتهي
ومهما قلنا ما ممكن نقول كفاية

قال تعالى : { وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا . وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا . رَّبُّكُمْ أَعْلَمُ بِمَا فِي نُفُوسِكُمْ إِن تَكُونُواْ صَالِحِينَ فَإِنَّهُ كَانَ لِلأَوَّابِينَ غَفُورًا }


ومن بر الوالدين:
. لا تدعها باسمها بل كنيتها بما تحب وتفرح به .
2. لا تجلس قبلها ...
3. لا تمش قبلها .
4. مقابلتها بطلاقة الوجه وبشاشته .
5. نصيحتها ولكن بالمعروف وإذا لم تقبل فلا تؤذهما .
6. إجابة دعوتها دون تضجر أو كراهية .
7. التكلم معها باللين .
8. أن تطعمها إذا جاعت .
9. أن تكسوها إذا عريت .
10. خدمتها إذا احتاجت .
11. امتثال أمرها ما لم يكن معصية .
12. ألا تسبقها بالأكل أو الشرب .
13. أن تدعو الله لها بالمغفرة والرحمة .
14. الغض عن أخطاء و زلات الأم ومحاولة نصحها برفق .
15. توقيرها واحترامها .
16. عدم التكبر والترفع عليها .
17. محاولة فعل الشيء الذي يجلب لها البهجة والسرور .
18. مصاحبتها بالمعروف وطلب الدعاء منها

ربي ارحمهما كما ربياني صغييرا

[اوراق شبابية]

السلام عليكم

blossom
مشكور على المشاركة
وربنا يوقفنا لبرهم


روني
والله لو عملنا اختبار في المواصفات اللي ذكرتها دي انا حأرسب

الله المستعان
بس الزول بحاول والله يعين