[اوراق شبابية]

اصحابي....... كلمة لما تقولها بتحس بنشوى...بتحس انك ما وحيد في الدنيا دي .... وان عندك اشخاص دايما معاك بيحسسوك بالأمان .... بس حأسألك سؤال: اصحابك مين؟؟؟؟
طبعا كل زول حأسله السؤال ده حيقول لي فلان وفلان وفلان ....طيب خليك معاي شويه وشغل الخيال .......اتخيل الرسول صلى الله عليه طلب منك طلب ، اكيد حتقول: من عيوني والله لوتطلب روحي حتكون فداك ! وقال لك: طلبي هو انك تعرفني بأصحابك!
هنا الجواب حيختلف...... في زول حيقول له : طبعا يارسول الله ! ويأخد بيد رسول الله ويعرفه .... ده صحبي فلان اللي دايماً كل ما الشلة تكون قاعدة بيقول صلوا على رسول الله وده صحبي فلان اللي كل يوم بيشجعنا نصلي صلاة الضحى مع بعض ويذكرنا بمواعيدها .... وهي حتقوله: دي صحبتي فلانة اللي بالرغم من معارضة اهلها لبست الحجاب ،ودي
صحبتي فلانة اللي تركت المصافحة عشان تتبع سنتك لأنها بتحبك .....
وفي نوع تاني حيقول: والله يارسول الله كان بودي بس ما أعتقد انك حتحبهم ! والتالت يتحجج بأي شي لأنه بيخجل انه رسول الله صلى الله عليه وسلم يشوف اصحابه!
ياترى انت حتكون مع ياتو صنف؟؟؟؟
ياترى اصحابك ديل ماخدينك لياتو طريق؟ هل قربوك من ربنا؟ ولا من ما صاحبتهم بعدت عنه؟
هل لما تسمع الحديث اللي فيه ان المرء يحشر مع من احب بترتاح وتتمنى انك تحشر مع اصحابك ؟؟؟ ولا بتخاف؟؟؟؟
هل اخترت اصحابك ولا بس اللي لقيتهم قدامك صاحبتهم والسلام ؟!
قال صلى الله عليه وسلم"المرء على دين خليله، فلينظر احدكم من يخالل"
فلينظر ده امر ! شوف انت مصاحب مين! لانه زي مابيقولو الصاحب ساحب، بإرادتك او غصب عنك حتتعلم منه، وحتتصرف زيه ! اللي ما بيسجر واصحابه بيسجره ضروري يجي يوم ويبقى زيهم...... واللي محجبة وصحباتها كلهم فاكيييين ضروري يجي يوم ويقنعوها بإنها تفكه! واللي بيصلي صلاواته كلها في المسجد واصحابه ما شغالين بالصلاة شوية شوية حيسيب صلاة المسجد وبعدها يسيب الصلاة كلها! دي حاجة طبيعية ومنطقية!
زول يسألني ويقول وبعد ماقريت الكلام ده اعمل شنو؟؟؟؟؟؟؟؟؟!
طيب عايز منك انك تحط صور اصحابك قدامك وتصنفهم معاي،،،،،، يقولك الاصحاب 3انواع:
1- اصحاب عاصين: وديل اللي اصلاً موضوع الدين ده على هامش حياته عايش كده بس!
ومن اقوالهم:
__الصلاة دي ملحوقه خلينا نخلص اللي في يدنا ده ( واحيانا ما بصلي اصلاً)___حجاب شنو ياخ ديل ناس معقدين ساي!____عليك الله عاين الزول ده مطول دقنه كيف! شكله لما تطول شديد بيقصها ويعملها حبل عشان يوفر____ انا البنات المنقبات ديل بضحكوني عديل زي اكياس زبالة ماشة بالرموت كنترول___ ياخي لسه صغار احنا على الحجاب ده! فكيه وعيشي حياتك____ يلعن ميتينك ياحمار!___دينك زاتو!(والعياذ بالله)....الخ
(يعني لا بيأدي الواجب ولا بيحفظ لسانه من السب والاستهزاء بالناس الملتزمة والنميمة وغيره وغيره)
التصرف معاهم: ابعد عنهم خاااااالص لانو ديل اكيد حيجروك للمعصية... وخلي بينك وبينهم شعره صغيره عسى الله ان يهدي احدهم على يديك
2- اصحاب غافلين: وديل غالباً اولاد الناس المؤدبين الظريفين ...لكن برضو امور الدين دي نص ونص
من افعالهم:
مثلاً بيكون بصلي صلواته كلها بس ما بمشي المسجد___بتتونس مع اولاد ، صح ما بتتجاوز حدودها زي الصنف الاول بس برضو مافي غض بصر ولا التزام بالاية ( ولا تخضعن بالقول) ___بتلبس طرحة بس ممكن تكون ملابسها ضيقة____بيحضر حفلات وبيسمع اغاني24 على 24 .....الخ
التصرف معاهم: ديل محتاجينك تعينهم على الخير ، ومحتاجين وقفتك جمبهم، ذكرهم بالله وفكر في حاجات تعملوها مع بعض تقربكم لربنا سوا
3- اصحاب طائعين: ديل ما بحتاجوا لوصف ، لو لقيتهم امسك فيهم بإيديك واسنانك ، لانهم بإذن الله حيوصلوك للجنة بصحبتهم، وحتى لو ما كانوا عندك...دور عليهم او اتعاون انت واصحابك انكم تكونوا زيهم
أخيراً ... ادعي ربنا انه اصحابك يكونوا نور في طريقك.....يعينوك على الطاعة.... ينصحوك لأنهم بيخافوا عليك.... وصحبتهم تدخلك الجنة!
(اللهم اغفر لاصدقائي جميعاً، واجعلنا متعاونين على طاعتك،متحابين فيك)